იაპონიის ოფიციალური ბიზნესდელეგაციის ვიზიტი კოლეჯ „არსში“

ეროვნული უწყვეტი პროფესიული განვითარების (CPD) და კარიერული განვითარების სისტემის II ფაზის ფარგლებში, კოლეჯ „არსს“ ოფიციალური სამუშაო ვიზიტით ეწვია იაპონიის ბიზნესდელეგაცია.

ვიზიტი მიზნად ისახავდა პარტნიორი საგანმანათლებლო დაწესებულებების შესაძლებლობების გაცნობას, პროფესიული განათლების განვითარების თანამედროვე მიდგომების განხილვას, ინსტიტუციური თანამშრომლობის გაღრმავებას და კოლეჯის მზადყოფნის შეფასებას ეროვნული უწყვეტი პროფესიული განვითარების (CPD) სისტემის საპილოტე ეტაპისთვის.

სამუშაო შეხვედრის ფარგლებში კოლეჯ „არსის“ ადმინისტრაციამ და იაპონელმა ექსპერტებმა განიხილეს:

პროფესიული საექთნო განათლების განვითარების თანამედროვე მიდგომები;

კომპეტენციებზე დაფუძნებული სასწავლო პროგრამების შემუშავებისა და განვითარების საკითხები;

უწყვეტი პროფესიული განვითარების (CPD) სისტემაში პროფესიული საგანმანათლებლო დაწესებულებების როლი;

ციფრული სწავლების მართვის სისტემის (Learning Management System – LMS) დანერგვის შესაძლებლობები;

კლინიკურ პარტნიორებთან თანამშრომლობის გაძლიერება;

კოლეჯის ჩართულობა ეროვნული CPD სისტემის საპილოტე ეტაპში და სტუდენტებისა და პროფესიონალების უწყვეტი პროფესიული განვითარების ხელშეწყობა.

ვიზიტის ფარგლებში კოლეჯს ეწვია კენჯი იჩიმურა (Kenji Ichimura, MSN, RN) — Vexon International Inc. (იაპონია)-ს საერთაშორისო ბიზნესის დირექტორი, იაპონიის გადაუდებელი დახმარების საექთნო ასოციაციის საბჭოს წევრი და სემინარების კომიტეტის თავმჯდომარე, ასევე ა(ა)იპ „ექთანთა გაერთიანების“ საერთაშორისო ექსპერტი.

ბატონ კენჯი იჩიმურას აქვს 20 წელზე მეტი კლინიკური და აკადემიური გამოცდილება საექთნო განათლების, პროფესიული განვითარების, კლინიკური ლიდერობის, კომპეტენციებზე დაფუძნებული სწავლებისა და საერთაშორისო პროფესიული თანამშრომლობის მიმართულებით. შეხვედრის ფარგლებში მან კოლეჯის წარმომადგენლებს გაუზიარა იაპონიისა და საერთაშორისო პრაქტიკის გამოცდილება პროფესიული განათლების, კლინიკური სწავლების, სასწავლო პროგრამების განვითარებისა და კომპეტენციების შეფასების თანამედროვე მოდელების შესახებ.

ვიზიტი განხორციელდა ა(ა)იპ „ექთანთა გაერთიანებისა“ და ა(ა)იპ „საქართველოს ბებიაქალთა ასოციაციის“ ერთობლივი კოორდინაციით, იაპონელ პარტნიორ ორგანიზაციებთან — Digital Knowledge Co., Ltd. და Vexon International Inc. — თანამშრომლობით.

კოლეჯ „არსისთვის“ აღნიშნული ვიზიტი მნიშვნელოვანი ეტაპია საერთაშორისო პარტნიორობის გაძლიერების, პროფესიული განათლების ხარისხის განვითარების და ინოვაციური საგანმანათლებლო მიდგომების დანერგვის მიმართულებით. ასევე, ეს წარმოადგენს მნიშვნელოვან შესაძლებლობას, კოლეჯმა აქტიური მონაწილეობა მიიღოს ეროვნული უწყვეტი პროფესიული განვითარების (CPD) სისტემის საპილოტე განხორციელებაში და თავისი წვლილი შეიტანოს საქართველოში ჯანმრთელობის პროფესიონალების განათლებისა და პროფესიული განვითარების თანამედროვე სისტემის ჩამოყალიბებაში.

კოლეჯ „არსი“ მადლობას უხდის იაპონელ პარტნიორებს, ა(ა)იპ „ექთანთა გაერთიანებას“, ა(ა)იპ „საქართველოს ბებიაქალთა ასოციაციას“ და პროექტში ჩართულ ყველა პარტნიორ ორგანიზაციას ნაყოფიერი თანამშრომლობისთვის. გვჯერა, რომ ეს პარტნიორობა შექმნის ახალ შესაძლებლობებს პროფესიული განათლების განვითარების, საერთაშორისო გამოცდილების გაზიარებისა და მომავალი ჯანმრთელობის პროფესიონალების მაღალი ხარისხით მომზადებისთვის.